Улсын Их Хурлын даргын 2024 оны 76 дугаар захирамжаар байгуулагдсан замын хөдөлгөөний аюулгүй байдлыг хангах зорилгоор цахилгаан дугуй (суррон), цахилгаан скүүтерийн хэрэглээг зохицуулах талаар хуулийн төсөл боловсруулах үүрэг бүхий Ажлын хэсгийн ээлжит хуралдаан (2025.04.10) боллоо.

Энэ удаагийн хуралдааныг Улсын Их Хурлын гишүүн Д.Цогтбаатар ахалж, Улсын Их Хурлын, ажлын хэсгийн гишүүн Г.Лувсанжамц нар цахилгаан дугуй, цахилгаан скүүтерийн түрээсийн үйлчилгээ үзүүлэгч аж ахуйн нэгжүүд болох “Ви Эм Си групп” (Tapa trip), “Жэт шаринг Монголиа” ХХК (Jet scooter mongolia), “Эко технологи” ХХК (Eco bike)-иудын төлөөллийг оролцуулан Замын хөдөлгөөний аюулгүй байдлын тухай хуульд (цахилгаан дугуй, скүүтерийн зохицуулалт) нэмэлт, өөрчлөлт оруулах тухай хуулийн төслөө танилцуулж, бизнес эрхлэгчдийнхээ саналыг сонслоо.

Нийслэл Улаанбаатар хотын хүн амын хэт төвлөрөл, хотжилт, авто замын түгжрэлээс үүдэлтэйгээр нийтийн хэрэглээний цахилгаан дугуй, скүүтер түрээсийн шинэ төрлийн үйлчилгээнүүд бий болж, иргэдийн хэрэглээ эрс өсч, үүний улмаас зам тээврийн осол гэмтэл, сөрөг үр дагаварууд гарсаар байгаа талаар ярилцсан. Тухайлбал, 2024 оны байдлаар “Жэт Шэйринг Монголиа” ХХК нь 6000 орчим цахилгаан скүүтер, “Ви Эм Си Групп” ХХК нь “Табо” нэртэй 1500 орчим цахилгаан скүүтер, “Эко технологи” ХХК нь “Эко байк” нэртэй 2500 орчим цахилгаан дугуйг иргэдийн хэрэглээнд нэвтрүүлсэн байна. Гэвч энэ төрлийн тээврийн хэрэгслийн түрээсийн үйлчилгээ үзүүлэгч нарт төрөөс хяналт тавих эрх зүйн орчин байхгүй байгаа нь хуулийн төсөл боловсруулах нэг шалтгаан болж байгаа юм.

Иймд хуулийн төсөлд нийтийн хэрэглээний цахилгаан дугуй, цахилгаан скүүтерийн үйлчилгээ үзүүлэгчийн эрх, үүргийг шинээр тусгаж, энэ төрлийн аж ахуйн үйл ажиллагааг зөвшөөрөлтэйгээр эрхлэх эрх зүйн орчныг бий болгохоор тусгасан гэлээ.

Ийнхүү аж ахуйн нэгжүүдийн төлөөлөл хуулийн төслийг зарчмын хувьд дэмжиж байгаагаа илэрхийлж, харин өнөөдрийн Улаанбаатар хотын зам, дэд бүтцийн асуудалтай холбоотойгоор өөрсдийн үйл ажиллагаанд тулгамдаж буй асуудлаар хуулийн төсөлд тодорхой саналуудаа ирүүлж, хамтран ажиллахаа илэрхийллээ.

АЖЛЫН АЛБА