“Төрийн мэдээлэл” эмхэтгэлийн шинэ дугаарт “Журам шинэчлэн батлах тухай” Монгол Улсын Засгийн газрын тогтоолуудыг нийтэлжээ. Тухайлбал, “Журам шинэчлэн батлах тухай” Монгол Улсын Засгийн газрын 139 дүгээр тогтоолын нэгдүгээр хавсралтаар “Хүүхдийн төлөө сангийн хөрөнгийг зарцуулах, түүнд хяналт тавих журам”-ыг баталж, тус журмаар сангийн удирдлага, зохион байгуулалт, санхүүжүүлэх төсөл, арга хэмжээ, хүүхдэд зориулсан бүтээн байгуулалтыг дэмжих болон олон улс, тив, дэлхийн соёл, урлаг, спортын уралдаан тэмцээн, наадамд оролцож, амжилт гаргасан хүүхдийг шагнаж урамшуулах зэрэг асуудлыг баталсан байна. Мөн журмын хоёрдугаар хавсралтаар “Хүүхэд оролцож амжилт гаргасан тохиолдолд сангаас шагнал урамшуулал олгох олон улс, тив, дэлхийн соёл, урлаг, спортын уралдаан тэмцээн, наадмын жагсаалт хүүхэд оролцож амжилт гаргасан тохиолдолд сангаас шагнал урамшуулал олгох олон улс, тив, дэлхийн соёл, урлаг, спортын уралдаан тэмцээн, наадмын жагсаалт”-ыг баталжээ.

Түүнчлэн “Журам шинэчлэн батлах тухай” Монгол Улсын Засгийн газрын 140 дүгээр тогтоолын хавсралтаар “Иргэнийг цэргийн жинхэнэ албанд эрүүл мэндээр тэнцүүлэх болон цэргийн алба хаагчийн эрүүл мэндийн байдлыг тодорхойлох журам”-ыг баталсан бөгөөд иргэнийг цэргийн жинхэнэ албанд эрүүл мэндээр тэнцүүлэх, тайван цагт алба хаах офицер, ахлагч, цэргийн гэрээт болон хугацаат цэргийн алба хаагчийн болон цэрэг, цагдаагийн дээд боловсролын сургалтын байгууллагад элсэн суралцах, оюутан-цэрэгт цэргийн мэргэжил олгох сургалтад хамрагдах, энхийг дэмжих ажиллагаанд үүрэг гүйцэтгэх алба хаагчийн эрүүл мэндийн байдлыг тодорхойлж, дүгнэлт гаргах талаар журамласан байна.

Журмын нэгдүгээр хавсралтад “Иргэнийг цэргийн жинхэнэ албанд эрүүл мэндээр тэнцүүлэх болон цэргийн алба хаагчийн эрүүл мэндийн байдлыг тодорхойлоход харгалзах өвчин, эмгэгийн жагсаалт”-ыг, хоёрдугаар хавсралтад “Цэргийн сургуульд элсэгч, зарим төрөл, мэргэжлийн цэргийн алба хаагчийн эрүүл мэндэд тавих нэмэлт шаардлага”-ыг, гуравдугаар хавсралтад “Иргэнийг цэргийн жинхэнэ албанд эрүүл мэндээр тэнцүүлэхэд мөрдөх биеийн жингийн харьцаа”-г, дөрөвдүгээр хавсралтад “Эрүүл мэндийн үзлэгийн хуудас”-ыг, тавдугаар хавсралтад “Иргэн, цэргийн алба хаагчийг тайван цагт цэргийн жинхэнэ албанаас эрүүл мэндээр чөлөөлөх өвчин эмгэгийн жагсаалт”-ыг тус тус тусгажээ хэмээн УИХ-ын Хэвлэл мэдээллийн газраас мэдээллээ.