“Төрийн мэдээлэл” эмхэтгэлийн шинэ дугаарт “Дүрэм батлах тухай”, “Аргачлал  батлах тухай”, “Жагсаалт шинэчлэн батлах тухай” Монгол Улсын Засгийн газрын тогтоолуудыг нийтэлжээ. Тухайлбал, “Дүрэм батлах тухай” Монгол Улсын Засгийн газрын тогтоолын хавсралтаар “Монополын эсрэг газрын дүрэм”-ийг баталсан бөгөөд тус дүрэмд Монополын эсрэг газар нь өрсөлдөөний болон аж ахуй эрхлэгч, хэрэглэгчийн эрхийг хамгаалах хууль тогтоомжийн биелэлтэд хяналт тавьж, өрсөлдөөний бодлогыг улсын хэмжээнд хэрэгжүүлэх, өрсөлдөөний соёлыг төлөвшүүлэх, шударга бус өрсөлдөөнөөс урьдчилан сэргийлэх ажлыг зохион байгуулах, арга зүйн удирдлагаар хангах, аж ахуй эрхлэгч, хэрэглэгчийг зах зээлд шударгаар өрсөлдөх нөхцөлийг бүрдүүлэх, хамгаалах чиг үүрэг бүхий байгууллага байна гэж тусгажээ. Мөн тус газар нь үйл ажиллагаагаа Өрсөлдөөний тухай хуулийн 14.7-д заасны дагуу жил бүр Засгийн газарт тайлагнахаас гадна сар бүрийн ажлын тайлангаа дараа сарын 05-ны өдрийн дотор эрхэлсэн сайддаа хүргүүлэхээр зохицуулсан байна.

Түүнчлэн “Аргачлал батлах тухай” Монгол Улсын Засгийн газрын 75 дугаар тогтоолын хавсралтаар “Тэтгэврийн хэмжээг нэмэгдүүлэх аргачлал”-ыг баталсан бөгөөд энэхүү аргачлалыг Нийгмийн даатгалын сангаас олгох тэтгэврийн тухай хууль, Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хууль, Цэргийн алба хаагчийн тэтгэвэр, тэтгэмжийн тухай хуулийн дагуу тэтгэвэр тогтоолгон авч буй тэтгэвэр авагчийн тэтгэврийн хэмжээг өмнөх оны инфляцын жилийн дундаж түвшинтэй уялдуулан нэмэгдүүлэхэд мөрдөхөөр тусгажээ.

Харин тус дугаарт нийтлэгдсэн “Жагсаалт шинэчлэн батлах тухай” Монгол Улсын Засгийн газрын тогтоолын хавсралтаар “Нээлттэй өгөгдөлийн жагсаалт”-ыг баталсан бөгөөд жагсаалтад тусгасан өгөгдлүүдтэй дэлгэрэнгүй танилцах боломжтой ажээ хэмээн  УИХ-ын Хэвлэл мэдээллийн газраас мэдээллээ.