“Төрийн мэдээлэл” эмхэтгэлийн шинэ дугаарт Монгол Улсын Их Хурлын 2025 оны хаврын ээлжит чуулганы хугацаанд хийх төлөвлөгөөт хяналт шалгалтын цаглавар батлах тухай, Монгол Улсын Их Хурлын 2025 оны хаврын ээлжит чуулганаар хэлэлцэх асуудлын тухай Монгол Улсын Их Хурлын тогтоолуудыг нийтэлсэн байна. Тухайлбал, Монгол Улсын Их Хурлын 2025 оны хаврын ээлжит чуулганы хугацаанд хийх төлөвлөгөөт хяналт шалгалтын цаглавар батлах тухай  Улсын Их Хурлын тогтоолд хууль тогтоомжийн биелэлтийг хянан шалгах ажлын хүрээнд 10, тайлан, мэдээлэл, илтгэл хэлэлцэх асуудлын хүрээнд 20, хууль тогтоомжийн биелэлтийн үр дагаварт үнэлгээ хийх ажлын хүрээнд нэг, төсвийн биелэлтийг хянан шалгах ажлын хүрээнд нэг, хяналт шалгалтын бусад хоёр асуудал буюу нийт 34 төлөвлөгөөт хяналт шалгалтыг Улсын Их Хурлын 2025 оны хаврын ээлжит чуулганы хугацаанд хийхээр тусгасан байна. Монгол Улсын Их Хурлын хяналт шалгалтын тухай хууль /Шинэчилсэн найруулга/-ийн дагуу Улсын Их Хурлаас ээлжит чуулганы хугацаанд хийх хяналт шалгалтыг төлөвлөж, Улсын Их Хурлын тогтоолоор баталснаар Монгол Улсын Үндсэн хуулийн Хорин тавдугаар зүйлийн 1 дэх хэсгийн 8-д заасан хууль, Улсын Их Хурлын бусад шийдвэрийн биелэлтийг хянан шалгах Улсын Их Хурлын онцгой бүрэн эрхийг үр дүнтэй хэрэгжүүлэх, түүнчлэн хяналт шалгалтын үр дүнг үндэслэн Байнгын хорооноос санал, дүгнэлт гаргаж, нэгдсэн хуралдаанд танилцуулах, Улсын Их Хурлын тогтоолын төслийг боловсруулж, нэгдсэн хуралдаанд оруулах, хэлэлцүүлэх ач холбогдолтой юм.

Монгол Улсын Их Хурлын 2025 оны хаврын ээлжит чуулганаар хэлэлцэх асуудлын тухай Улсын Их Хурлын тогтоолоор Монгол Улсын Их Хурлын 2025 оны хаврын ээлжит чуулганаар дараах асуудлыг хэлэлцэхээр төлөвлөсөн байна. Үүнд: 1/Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуулийн төсөл; 2/“Монгол Улсын хөгжлийн 2026 оны төлөвлөгөө батлах тухай” Монгол Улсын Их Хурлын тогтоолын төсөл; 3/Монгол Улсын нэгдсэн төсвийн 2024 оны гүйцэтгэл, Засгийн газрын санхүүгийн нэгтгэсэн тайлан болон “Монгол Улсын 2024 оны төсвийн гүйцэтгэл батлах тухай” Монгол Улсын Их Хурлын тогтоолын төсөл; 4/“Засгийн газрын өрийн удирдлагын 2026-2028 оны стратегийн баримт бичиг батлах тухай” Монгол Улсын Их Хурлын тогтоолын төсөл;  5/“Монгол Улсын Их Хурлын 2025 оны намрын ээлжит чуулганы хугацаанд хийх төлөвлөгөөт хяналт шалгалтын цаглавар батлах тухай” Монгол Улсын Их Хурлын тогтоолын төсөл; 6/“Монгол Улсын Их Хурлын 2025 оны намрын ээлжит чуулганаар хэлэлцэх асуудлын тухай” Монгол Улсын Их Хурлын тогтоолын төсөл ажээ хэмээн УИХ-ын Хэвлэл мэдээллийн газраас мэдээллээ.