“Төрийн мэдээлэл” эмхэтгэлийн шинэ дугаарт  Татварын ерөнхий хуульд нэмэлт, өөрчлөлт оруулах тухай, Зээлийн хэлэлцээр соёрхон батлах тухай  Монгол Улсын хуулиуд болон Монгол Улсын Засгийн газар болон­ Бүгд Найрамдах Энэтхэг Улсын Экспорт-Импортын банк хоорондын  2025 оны 01 дүгээр сарын 16-ны өдрийн зээлийн хэлэлцээрийг нийтэлсэнтэй дэлгэрэнгүй танилцах боломжтой юм. Тухайлбал,  Татварын ерөнхий хуульд нэмэлт, өөрчлөлт оруулах тухай хуулиар дараах асуудлыг зохицуулсан. Үүнд: -Татвар төлөгчийн эрх, хууль ёсны ашиг сонирхлыг хамгаалах, эрсдэлээс урьдчилан сэргийлэх зорилгоор доор дурдсан мэдээллийг татвар төлөгчийн зөвшөөрөлгүйгээр татварын асуудал хариуцсан төрийн захиргааны байгууллага жагсаалт хэлбэрээр албан ёсны цахим хуудсанд нийтэлж, олон нийтэд мэдээлэх зохицуулалт тусгагдсан; -санхүүгийн баримтыг хуурамчаар үйлдсэн эсэх нь хууль хяналтын байгууллагаар хянан шалгагдаж байгаа”, “хууль хяналтын байгууллагын, эсхүл шүүхийн шийдвэрээр эрэн сурвалжлагдаж байгаа” татвар төлөгчийн талаарх энэ хуульд заасан мэдээллийг олон нийтэд мэдээлэх зохицуулалт тусгагдсан; -санхүүгийн баримтыг хуурамчаар үйлдсэн эсэх нь хууль хяналтын байгууллагаар хянан шалгагдаж байгаа татвар төлөгчийн нэр, татвар төлөгчийн болон улсын бүртгэлийн дугаар, шалгагдаж байгаа асуудлын талаарх мэдээллийг олон нийтэд мэдээлэх бол хууль хяналтын байгууллагын, эсхүл шүүхийн шийдвэрээр эрэн сурвалжлагдаж байгаа татвар төлөгчийн нэр, татвар төлөгчийн болон улсын бүртгэлийн дугаарын мэдээллийг олон нийтэд мэдээлэх зохицуулалт тусгагдсан. Харин Зээлийн хэлэлцээр соёрхон батлах тухай  Монгол Улсын хуулиар 2025 оны 01 дүгээр сарын 16-ны өдөр байгуулсан Монгол Улсын Засгийн газар, Бүгд Найрамдах Энэтхэг Улсын Экспорт-Импорт банк хоорондын Зээлийн хэлэлцээрийг Монгол Улсын Засгийн газрын өргөн мэдүүлснээр соёрхон баталсан бөгөөд тус хэлэлцээрийг соёрхон баталснаар Энэтхэг Улсын ЭКСИМ банкны зээлийн эх үүсвэрээр “Газрын тос боловсруулах үйлдвэр барих” төслийн инженерчлэл, худалдан авалт, барилга угсралтын багц ажил болон магадалшгүй бусад ажилд шаардагдах зардлыг санхүүжүүлэх юм. Эмхэтгэлийн шинэ дугаарт Засгийн газарт чиглэл өгөх тухай, “Шүүгчид нэмэгдэл олгох журам батлах тухай” тогтоол хүчингүй болсонд тооцох тухай, “Зарим байгууллагын цалингийн хэмжээг шинэчлэн тогтоох тухай” тогтоолд өөрчлөлт  оруулах тухай, Монгол Улсын Эрдэнэсийн сангийн орлого, зарлагын 2024 оны гүйцэтгэл, 2025 оны төсвийн тухай, “Төрийн захиргааны байгууллагын тогтолцоо, бүтцийн ерөнхий бүдүүвч”-д нэмэлт оруулах тухай, “Зарим байгууллагын цалингийн хэмжээг шинэчлэн тогтоох тухай” Улсын Их Хурлын тогтоолд нэмэлт, өөрчлөлт оруулах тухай Монгол Улсын Их Хурлын тогтоолуудыг нийтэлсэн байна. Тухайлбал, Засгийн газарт чиглэл өгөх тухай Улсын Их Хурлын тогтоолоор БНМАУ-ын Ардын Их Хурлын Тэргүүлэгчдийн дарга асан, Хөдөлмөрийн баатар, Онц бөгөөд Бүрэн эрхт Элчин сайд, төр, нийгмийн зүтгэлтэн Жамсрангийн Самбуугийн мэндэлсний 130 жилийн ой 2025 онд тохиож байгаатай холбогдуулан түүний алдар гавьяаг мөнхжүүлэх зорилгоор дараах арга хэмжээг авч хэрэгжүүлэхийг Монгол Улсын Засгийн газарт даалгасан байна. Үүнд: 1/Нийтээр тэмдэглэх баярын болон тэмдэглэлт өдрүүдийн тухай хуулийн 5 дугаар зүйлийн 5.2 дахь хэсэгт заасны дагуу Жамсрангийн Самбуугийн мэндэлсний 130 жилийн ойг тэмдэглэх өдрийн товыг тогтоож, ойг тэмдэглэн өнгөрүүлэх бэлтгэл ажлын төлөвлөгөө, үйл ажиллагааны хөтөлбөр баталж, зохион байгуулах үүрэг бүхий ажлын хэсэг байгуулан ажиллуулах; 2/Жамсрангийн Самбуугийн Монгол Улсын эдийн засаг, нийгмийг хөгжүүлэх, олон улсын харилцааг бэхжүүлэх, энх тайвныг сахин хамгаалах, төрийн албыг төлөвшүүлэхэд гүйцэтгэсэн үүрэг, түүний амьдрал, үйл ажиллагааг олон нийтэд сурталчлан таниулах ажлыг зохион байгуулах; 3/ойг тэмдэглэн өнгөрүүлэх арга хэмжээнд шаардагдах зардлыг санхүүжүүлэхийг хууль тогтоомжид заасан эрх хэмжээнийхээ хүрээнд судалж шийдвэрлэх ажээ.

Түүнчлэн “Шүүгчид нэмэгдэл олгох журам батлах тухай” тогтоол хүчингүй болсонд тооцох тухай Улсын Их Хурлын тогтоолоор “Шүүгчид нэмэгдэл олгох журам батлах тухай" Монгол Улсын Их Хурлын 2021 оны 01 дүгээр сарын 14-ний өдрийн 04 дүгээр тогтоолыг хүчингүй болсонд тооцсон. “Зарим байгууллагын цалингийн хэмжээг шинэчлэн тогтоох тухай” Улсын Их Хурлын тогтоолоор Монгол Улсын шүүхийн тухай хуулийн 46 дугаар зүйлийн 46.3 дахь хэсэг, 76 дугаар зүйлийн 76.10 дахь хэсэг, 95 дугаар зүйлийн 95.10 дахь хэсэгт тус тус заасныг үндэслэн Шүүхийн ерөнхий зөвлөлийн дарга, шүүгч бус гишүүн, Сахилгын хорооны дарга, шүүгч бус гишүүний албан тушаалын цалингийн хэмжээг тогтоосон Улсын Их Хурлын 2023 оны 117 дугаар тогтоол, уг тогтоолын 3, 4 дүгээр хавсралтад өөрчлөлт оруулж, тэдгээр албан тушаалын цалин, нэмэгдлийн хэмжээг шинэчлэн тогтоосон.

Мөн Монгол Улсын Эрдэнэсийн сангийн орлого, зарлагын 2024 оны гүйцэтгэл, 2025 оны төсвийн тухай Улсын Их Хурлын тогтоолыг баталснаар Монгол Улсын түүх, соёлын ховор нандин үнэт зүйлсийн баялаг цуглуулгатай болох, цуглуулгаа сэргээн засварлах, арчлах, үзмэр үзэсгэлэн зохион байгуулах, нийтэд сурталчлах зэрэг ач холбогдолтой юм.

Төрийн захиргааны байгууллагын тогтолцоо, бүтцийн ерөнхий бүдүүвч”-д нэмэлт оруулах тухай Улсын Их Хурлын тогтоолоор “Төрийн захиргааны байгууллагын тогтолцоо, бүтцийн ерөнхий бүдүүвчийг шинэчлэн батлах тухай” Монгол Улсын Их Хурлын 2024 оны долдугаар сарын 10-ны өдрийн 13 дугаар тогтоолын хавсралтаар баталсан “Төрийн захиргааны байгууллагын тогтолцоо, бүтцийн ерөнхий бүдүүвч”-ийн Зам, тээврийн сайдын эрхлэх асуудлын хүрээний “Засгийн газрын хэрэгжүүлэгч агентлаг” хэсэгт “-Төмөр замын газар” гэж нэмсэн.

Түүнчлэн “Зарим байгууллагын цалингийн хэмжээг шинэчлэн тогтоох тухай” Улсын Их Хурлын тогтоолд нэмэлт, өөрчлөлт оруулах тухай  Улсын Их Хурлын тогтоолоор Улсын Их Хурлаас цалингийн хэмжээг тогтоодог Үндсэн хуулийн цэц, Улсын Ерөнхий прокурорын газар, Үндэсний аудитын газар, Авлигатай тэмцэх газраас ирүүлсэн саналуудад үндэслэн холбогдох хууль тогтоомжид заасны дагуу цалингийн хэмжээг өөрчлөн баталсан ажээ хэмээн УИХ-ын Хэвлэл мэдээллийн газраас мэдээллээ.