Улсын Их Хурлын Төрийн байгуулалтын байнгын хорооны өнөөдрийн (2020.12.09) хуралдаан 10 цаг 32 минутад эхэллээ. Хуралдааны эхэнд Байнгын хорооны дарга Л.Энх-Амгалан хэлэлцэх асуудлын дарааллыг танилцуулахад Улсын Их Хурлын гишүүн, Улсын Их Хурал дахь АН-ын бүлгийн дэд дарга Н.Ганибал завсарлага авах талаарх бүлгийн саналыг танилцуулав. Улсын Их Хурал дахь АН-ын бүлэг Монгол Улсын Ерөнхийлөгчийн сонгуулийн тухай хуулийн төслийг хэлэлцэн, зарчмын зөрүүтэй саналын томьёолол боловсруулах, санал, дүгнэлт бэлтгэх ажлын хэсэг байгуулан ажиллаж байгаа гэв. Тус ажлын хэсгийн боловсруулсан зарчмын зөрүүтэй саналын томьёолол, бэлтгэсэн санал, дүгнэлтийг бүлгийн хурлаар хэлэлцэх шаардлагатай тул Монгол Улсын Их Хурлын тухай хуулийн 33 дугаар зүйлийн 33.1.4, Монгол Улсын Их Хурлын чуулганы хуралдааны дэгийн хуулийн 15 дугаар зүйлийн 15.1-т тус тус заасныг үндэслэн гурав хоногийн завсарлага авах саналаа танилцуулсан. Байнгын хорооны дарга нэг хоногийн завсарлага өгснөөр Монгол Улсын Ерөнхийлөгчийн сонгуулийн тухай хуулийн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг маргааш хэлэлцэхээр боллоо.

Хуулийн төслийн анхны хэлэлцүүлгийг хийв

    Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн шинэчилсэн найруулгын төсөл болон хамт өргөн мэдүүлсэн хууль, Улсын Их Хурлын тогтоолын төслүүдийн анхны хэлэлцүүлгээр Байнгын хорооны хуралдаан эхэллээ. Төслүүдийг анхны хэлэлцүүлэгт бэлтгэсэн талаар Улсын Их Хурлын гишүүн, ажлын хэсгийн ахлагч Ж.Сүхбаатар танилцуулав. Чуулганы нэгдсэн хуралдаанаар төслүүдийн анхны хэлэлцүүлгийг хийх үеэр хуралдаан даргалагчаас уг асуудлыг гүйцээн боловсруулах чиглэл өгсөн, мөн аймаг, орон нутгийн шинээр сонгогдсон ИТХ-ын гишүүд, Засаг дарга нар төсөлтэй холбоотой саналууд ирүүлсэн, Улсын Их Хурлын Нутгийн удирдлагын дэд хорооны шийдвэртэй холбоотойгоор ажлын хэсэг тал бүрийн байр суурийг сонсож ажилласан гэв. Тус ажлын хэсэг 2020 оны 12 дугаар сарын 8-ны өдөр хуралдаж, зарчмын зөрүүтэй саналын томьёолол бэлтгэсэн байна. Ж.Сүхбаатар гишүүн ажлын хэсгээс бэлтгэсэн уг саналын томьёоллуудаар санал хураалт явуулах горимын санал гаргаж, энэ дагуу санал хураалт явуулахад хуралдаанд цахимаар болон танхимаар оролцсон 12 гишүүний 8 нь дэмжив. Иймд зарчмын зөрүүтэй саналын томьёолол нэг бүрээр санал хураалт явуулан шийдвэрлэлээ. Тухайлбал, төслийн 5 дугаар зүйлийн 5.2 дахь хэсгийг “Монгол Улсын Үндсэн хуулийн Тавин наймдугаар зүйлийн 1 дэх хэсэгт заасан ёсоор аймаг, сум, нийслэл, дүүрэг эрх зүйн харилцаанд хуулийн этгээдийн нэгэн адил оролцоно” гэж өөрчлөн найруулахийг хуралдаанд оролцсон гишүүдийн олонх дэмжсэн.

Төслийн 18 дугаар зүйлийн “Засаг захиргаа, нутаг дэвсгэрийн нэгжийн өмч” гэсэн гарчгийг “Аймаг, сум, нийслэл, дүүргийн өмч” гэж өөрчлөхийг, 34 дүгээр зүйлийн 34.2 дахь хэсгийг хасахыг, 34 дүгээр зүйлийн 34.1 дэх хэсэгт “нийслэл” гэж нэмэхийг Байнгын хорооны хуралдаанд оролцсон гишүүдийн олонх дэмжив. Төслийн 61 дүгээр зүйлд “61.1.22  Сумын Засаг даргын орлогч, Тамгын газрын даргыг томилох, чөлөөлөх, огцруулах” гэсэн 61.1.22 дахь заалтыг нэмж, дугаарлалтыг өөрчлөхийг гишүүд 66.7 хувийн саналаар, төслийн 62 дугаар зүйлд “62.1.22 Аймгийн Засаг даргын орлогч, Тамгын газрын даргыг томилох, чөлөөлөх, огцруулах” гэсэн 62.1.22 дахь заалтыг нэмж, дугаарлалтыг өөрчлөхийг гишүүд 58.3 хувийн саналаар тус тус дэмжлээ. Түүнчлэн төслийн 18 дугаар зүйлийн 18.1 дэх хэсгийг “18.1 Аймаг, сум, нийслэл, дүүрэг нь Монгол Улсын Үндсэн хуулийн Зургадугаар зүйлийн 2 дахь хэсэгт зааснаас бусад өмчтэй байна” гэж өөрчлөхийг гишүүд дэмжсэнгүй. Улсын Их Хурлын гишүүн С.Бямбацогт төслийн 14 дүгээр зүйлд Монгол Улсын засаг захиргаа, нутаг дэвсгэрийн нэрийг төрийн албан ёсны хэлээр нэрлэж, хаягийг монгол хэлээр нэрлэх агуулга бүхий 14.3 дахь заалтыг нэмэхийг хуралдаанд оролцсон 13 гишүүний 9 нь 69.2 хувийн саналаар дэмжсэн. Ийнхүү төслүүдийн анхны хэлэлцүүлгийг хийж, энэ талаарх Байнгын хорооны санал, дүгнэлтийг чуулганы нэгдсэн хуралдаанд танилцуулахаар тогтов.

УИХ-ын тогтоолын төслүүдийг хэлэлцэв

    “Монгол Улсын Их Хурлын сонгуулийн 28 дугаар тойрогт нөхөн сонгууль товлон зарлах, санал авах өдрийг тогтоох тухай” Улсын Их Хурлын тогтоолын төслийг хэлэлцэж, Улсын Их Хурлын гишүүн Д.Тогтохсүрэн төслийн талаар танилцууллаа. Улсын Их Хурлын 2020 оны 10 дугаар сарын 23-ны өдрийн 30 дугаар тогтоолоор Улсын Их Хурлын гишүүн Д.Сумъяабазарыг хүсэлтийнх нь дагуу Улсын Их Хурлын гишүүнээс чөлөөлсөн. Үүнтэй холбогдуулан Улсын Их Хурал нөхөн сонгууль зарлах шаардлага үүссэн байна. Улсын Их Хурлын сонгуулийн тухай хуулийн 9 дүгээр зүйлийн 9.9-д “Улсын Их Хурал нөхөн сонгуулийг санал авах өдрийн хамт санал авах өдрөөс 70-аас доошгүй хоногийн өмнө нөхөн сонгууль явуулах нөхцөл байдал үүссэнээс хойш 50 хоногийн дотор энэ хуульд нийцүүлэн товлон зарлана” гэж заасан. Хуульд заасан хугацаа 12 дугаар сарын 13-ны өдөр дуусах тул хуулийн хугацаанд багтаан асуудлыг шийдвэрлэх шаардлагатай талаар тэрбээр танилцуулгадаа дурдсан. Төсөлд Монгол Улсын Их Хурлын сонгуулийн 28 дугаар тойрогт нөхөн сонгуулийг Монгол Улсын Ерөнхийлөгчийн сонгуультай хамт зохион байгуулахаар тусгасан байна.

    Улсын Их Хурлын тогтоолын төслүүдийн танилцуулгатай холбогдуулан Улсын Их Хурлын гишүүн Б.Пүрэвдорж, Ё.Баатарбилэг, Ж.Мөнхбат, С.Бямбацогт, Л.Энх-Амгалан нар асуулт асууж, ажлын хэсгээс хариулт авлаа.

    Монгол Улсын Их Хурлын сонгуулийн нөхөн сонгууль, Монгол Улсын Ерөнхийлөгчийн сонгуулийг хамт зохион байгуулахад үүсэх хүндрэл, зөрчлийн талаарх асуултад Сонгуулийн ерөнхий хорооны дарга П.Дэлгэрнаран хариулахдаа, зардлын хувьд хэмнэлт гарах хэдий ч иргэдийн шилжилт хөдөлгөөн, сонгуулийн сурталчилгааны хугацаа гэх мэт тус тусдаа зохицуулалттай хоёр сонгууль гэв. Эрх зүйн зохицуулалт хооронд зөрчил үүсэх, саналын хуудасны программчлалтай холбоотой хүндрэл үүсэх магадлалтай гэлээ.

    Сонгууль болсны дараа сонгуулийн дүнтэй холбоотой маргаан үүсэхээс сэргийлж холбогдох эрх зүйн орчныг боловсронгуй болгох саналыг Ё.Баатарбилэг гишүүн гаргасан бол Улсын Их Хурлын гишүүн Ж.Сүхбаатар төслийг хэлэлцэхийг дэмжиж буйгаа хэлээд, санал хураалтын системтэй холбоотой байр сууриа илэрхийлсэн юм. Улсын Их Хурлын гишүүн Ц.Мөнх-Оргил санал хураалтын системтэй холбоотой үг хэлж, саналын хуудсын программчлалтай холбоотой санал хэлэв. Бусад улс орнуудын сонгуульдаа хэрэглэдэг шинэ технологиудын талаарх мэдээллийг Ж.Мөнхбат гишүүн дурдаад “Иргэдийн сонгох эрхийг баталгаатай хангах, сонгуулийг маргаангүй зохион байгуулах үүднээс бид санал хураалтын систем, технологийг шинэчлэх шаардлагатай” гэв. Аль ч шатны сонгуульд оролцсон иргэнд хурууны тэмдэглэгээ хийдэг байх зохицуулалтыг нэвтрүүлэх саналыг Ж.Батсуурь гишүүн гаргасан бол С.Бямбацогт гишүүн тогтоолын төслүүдийн хэлэлцүүлгийг хойшлуулах санал хэлж байв. Монгол Улсын Их Хурлын сонгуулийн 28 дугаар тойрогт нөхөн сонгуулийг дангаар нь зохион байгуулсан тохиолдолд 1 тэрбум гаруй төгрөг, харин Монгол Улсын Ерөнхийлөгчийн сонгуультай хамт зохион байгуулсан тохиолдолд 100 гаруй сая төгрөгийн зардалтайг Байнгын хорооны дарга онцлоод, цар тахал нүүрлээд байгаа энэ цаг үед татвар төлөгчдийн мөнгийг болох хэмжээгээрээ хэмнэх, зарцуулалт бүр үр ашигтай, оновчтой байх ёстой гэдэг байр суурийг илэрхийлсэн. Ингээд Монгол Улсын Их Хурлын сонгуулийн 28 дугаар тойрогт нөхөн сонгуулийг 2020 оны 12 дугаар сарын 10-ны өдрөөс эхлэхээр, Монгол Улсын Их Хурлын сонгуулийн 28 дугаар тойрогт явагдах Улсын Их Хурлын гишүүний нөхөн сонгуулийг 2020 оны 12 дугаар сарын 10-ны өдрөөс эхлэхээр, Монгол Улсын Их Хурлын сонгуулийн 28 дугаар тойрогт явагдах Улсын Их Хурлын гишүүний нөхөн сонгуулийн санал авах ажиллагааг 2021 оны Монгол Улсын Ерөнхийлөгчийн ээлжит сонгуулийн санал авах өдөртэй хамт явуулах зохицуулалтыг тусгасан тогтоолын төслийг дэмжих эсэхээр санал хураалт явуулахад хуралдаанд оролцсон 13 гишүүний 11 нь дэмжлээ.

    Дараа нь “Монгол Улсын Их Хурлын сонгуулийн 28 дугаар тойргийн нөхөн сонгуульд техник хэрэгсэл хэрэглэх тухай” Улсын Их Хурлын тогтоолын төслийг дэмжих эсэхээр санал хураалт явуулахад Байнгын хорооны гишүүдийн 93.8 хувь нь, “Монгол Улсын Их Хурлын сонгуулийн 28 дугаар тойрогт явагдах нөхөн сонгуулийн зардлын хэмжээг батлах тухай” Улсын Их Хурлын тогтоолын төслийг дэмжих эсэхээр санал хураалт явуулахад Байнгын хорооны гишүүдийн 53.3 хувь нь дэмжсэн тул санал, дүгнэлтүүдийг чуулганы нэгдсэн хуралдаанд тус бүрд нь танилцуулахаар шийдвэрлэлээ.

МҮОНРТ-ийн Yндэсний зөвлөлийн гишүүдийг чөлөөлж, томилохыг дэмжив

    Байнгын хорооны хуралдаанаар үргэлжлүүлэн “Монголын Үндэсний олон нийтийн радио, телевизийн Yндэсний зөвлөлийн гишүүнээс чөлөөлөх, томилох тухай” Улсын Их Хурлын тогтоолын төслийг хэлэлцлээ. Монголын Үндэсний олон нийтийн радио, телевизийн Үндэсний зөвлөлийн 15 гишүүний 7 гишүүний бүрэн эрх дуусгавар болж байгааг Л.Энх-Амгалан дарга танилцуулав. Тус зөвлөлд Засгийн газраас нэр дэвшүүлэн ажиллаж байсан Ө.Золбаяр, З.Энхболд нарын бүрэн эрхийн хугацаа дуусгавар болсонтой холбогдуулан Олон нийтийн радио, телевизийн тухай хуулийн 21.5-д заасныг үндэслэн М.Уянга, Г.Отгонбаяр нарыг Олон нийтийн радио, телевизийн удирдах дээд байгууллага Үндэсний зөвлөлийн гишүүнд нэр дэвшүүлж буйг Улсын Их Хурлын гишүүн, Монгол Улсын сайд, Засгийн газрын Хэрэг эрхлэх газрын дарга Л.Оюун-Эрдэнэ танилцууллаа. Нэр дэвшигч Маруушийн Уянга нь 1973 онд Улаанбаатар хотод төрсөн. 1991 онд 10 жилийн 5 дугаар дунд сургууль, 1998 онд Москвагийн Соёл урлагийн их сургууль төгссөн. Телевизийн цэнгээнт нэвтрүүлгийн зохиогч, хөтлөгч найруулагч, менежер мэргэжилтэй. Соёл судлалын докторын зэрэгтэй. Дараагийн нэр дэвшигч Гомбожавын Отгонбаяр нь 1973 онд Говь-Алтай аймгийн Алтай суманд төрсөн. 1991 онд нийслэлийн 16 дугаар дунд сургууль, 1996 онд Улаанбаатар төмөр замын дээд сургууль, 2011 онд Монгол Улсын боловсролын их сургуулийг төгссөн, инженер, сэтгүүлч мэргэжилтэй, сэтгүүл зүйн магистр зэрэгтэй юм байна.

    Монголын Үндэсний олон нийтийн радио, телевизийн Үндэсний зөвлөлийн гишүүн Д.Нямсамбуугийн бүрэн эрхийн хугацаа дуусгавар болсонтой холбогдуулан Олон нийтийн радио, телевизийн тухай хуулийн 21 дүгээр зүйлийн 21.5.1, 21.7-д заасны дагуу Монгол Улсын Ерөнхийлөгчөөс Ж.Цэсэнг тус зөвлөлийн гишүүнд нэр дэвшүүлж буйг Ерөнхийлөгчийн Гадаад бодлогын зөвлөх Т.Тэгшжаргал танилцууллаа. Нэр дэвшигч Жигжидийн Цэсэн нь 39 настай, Сүхбаатар аймгийн 10 жилийн I сургуулийг 1998 онд, Улсын Багшийн Их Сургуулийг сэтгүүлч-орчуулагч мэргэжлээр 2003 онд тус тус төгссөн байна. Уран зохиолын магистр, төрийн удирдлагын магистрын зэрэгтэй. Тэрбээр 2000-2001 онд “Шар сонин” хэвлэлд сэтгүүлч, 2001-2002 онд Нийслэлийн Улаанбаатар радиод сэтгүүлч, 2002-2007 онд “Мянганы зууч” сонины албаны дарга, тоймчоор, 2007-2010 онд  “Ардчилал сонин” хэвлэлийн албаны дарга, тоймчоор, 2008-2012 онд Зам тээвэр, барилга, хот байгуулалтын яамны хэвлэлийн төлөөлөгчөөр, 2012-2014 онд Үйлдвэр, хөдөө аж ахуйн яамны хэвлэлийн төлөөлөгчөөр, 2017-2019 онд Ерөнхийлөгчийн Тамгын газрын Хэвлэл мэдээллийн хэлтсийн албаны даргаар, 2019-2020 онд “Сайн Пи ар” агентлагт зөвлөхөөр тус тус ажиллажээ.

    Дээрх зөвлөлд Улсын Их Хурлаас нэр дэвшүүлэн ажиллаж байсан Б.Батбаяр, Д.Цэндсүрэн, Д.Оюун-Эрдэнэ, Б.Энхмандах нарын бүрэн эрхийн хугацаа дуусгавар болж байгаа юм байна. Төрийн байгуулалтын байнгын хороо 2020 оны 12 дугаар сарын 03-ны өдрийн 05 дугаар тогтоолоор Улсын Их Хурлын гишүүн Д.Тогтохсүрэнгээр ахлуулсан Улсын Их Хурлаас Монголын Үндэсний олон нийтийн радио, телевизийн Yндэсний зөвлөлийн гишүүнд нэр дэвшигчийг сонгон шалгаруулах үүрэг бүхий ажлын хэсгийг байгуулсан юм. Ажлын хэсгийн танилцуулгыг Улсын Их Хурлын гишүүн Д.Тогтохсүрэн танилцуулсан юм. Нийт 27 төрийн бус байгууллагаас 28 нэр дэвшигчийн материалыг ажлын хэсэгт ирүүлсэн ба шаардлага хангасан 25 нэр дэвшигчийг Байнгын хорооны хуралдаанд танилцууллаа. Нэр дэвшигчдийн 12 нь сэтгүүл зүй, 3 нь хөдөлмөр, нийгмийн хамгаалал, 2 нь байгаль, орчны чиглэлийнх байсан бол боловсроын чиглэлийн 4, эрх зүйн чиглэлийн 2, гадаад харилцааны чиглэлийн 2 хүн байгааг Д.Тогтохсүрэн гишүүн танилцуулгадаа дурдсан. Нэр дэвшигчдийн талаарх товч танилцуулгыг ажлын хэсгийн ахлагч танилцуулсны дараа Байнгын хорооны гишүүд асуулт асууж, хариулт авав.

    Улсын Их Хурлын гишүүн Д.Тогтохсүрэн Монгол Улсын Ерөнхийлөгч болон Засгийн газраас Монголын Үндэсний олон нийтийн радио, телевизийн Үндэсний зөвлөлийн гишүүнд нэр дэвшүүлж буй нэр дэвшигчдийн талаар ил санал хураалт явуулан шийдвэрлээд, дараа нь Улсын Их Хуралд хүсэлт ирүүлсэн 25 нэр дэвшигчийн асуудлыг нууц санал хураалтаар шийдвэрлэх горимын санал гаргасан. Горимын саналаар санал хураалт явуулахад 68.8 хувь нь дэмжсэн юм.  Улсын Их Хурлаас Монголын Үндэсний олон нийтийн радио, телевизийн Үндэсний зөвлөлийн гишүүнд нэр дэвшиж буй 25 нэр дэвшигчээс сонгох нууц санал хураалтыг зохион байгуулахаар тогтсон бөгөөд Тооллогын комисс байгуулж, ахлагчаар нь Ё.Баатарбилэг гишүүнийг томиллоо.  

    Дараа нь Ерөнхийлөгчөөс нэр дэвшүүлсэн Ж.Цэсэнг Монголын Үндэсний олон нийтийн радио, телевизийн Үндэсний зөвлөлийн гишүүнээр томилуулахыг дэмжих эсэх томьёоллоор санал хураалт явууллаа. Хуралдаанд оролцсон 15 гишүүн санал нэгтэйгээр дэмжсэн юм. Дараа нь Засгийн газраас нэр дэвшүүлж буй Г.Отгонбаярын  Монголын Үндэсний олон нийтийн радио, телевизийн Үндэсний зөвлөлийн гишүүнээр томилуулахыг дэмжих эсэхээр санал хураахад гишүүд санал нэгтэйгээр дэмжив. Засгийн газраас нэр дэвшүүлж буй М.Уянгыг  Монголын Үндэсний олон нийтийн радио, телевизийн Үндэсний зөвлөлийн гишүүнээр томилуулахыг хуралдаанд оролцсон гишүүдийн 93.3 хувь нь дэмжсэн.

Үргэлжлүүлэн Улсын Их Хурлаас Монголын Үндэсний олон нийтийн радио, телевизийн Үндэсний зөвлөлийн гишүүнд нэр дэвшиж буй 25 нэр дэвшигчээс сонгох нууц санал хураалтыг зохион байгуулав. Нууц санал хураалтад Улсын Их Хурлын Төрийн байгуулалтын байнгын хорооны 16 гишүүн оролцсон бөгөөд саналын бүх хуудас хүчинтэй байсан талаар Тооллогын комиссын дарга танилцууллаа. Санал хураалтын дүнд Дамдингийн Цоодол 12 санал, Мянганбуугийн Наранбаатар 12 санал, Чулуунбаатарын Батцэнгэл 11 санал, Баасанжавын Ганболд 8 санал тус тус авсан.

    Нэр дэвшигч Д.Цоодол нь 1967 онд Хөвсгөл аймгийн Галт суманд төрсөн. 1985 онд 10 жилийн дунд сургууль, 1989 онд Улсын Багшийн Дээд сургууль төгссөн, сэтгүүлч мэргэжилтэй. Сэтгүүл зүйн магистрын зэрэгтэй. 1989-2016 онд Монголын Үндэсний олон нийтийн телевизийн нэвтрүүлэгч, 2012-2016 онд Монголын Үндэсний олон нийтийн телевизийн V нэгдлийн дарга, 2014-2016 онд Кино программын Ерөнхий продюссер, 2016 оноос “Цэцэн” энтертайнментийн захирлаар ажиллаж байгаа юм байна.

    Нэр дэвшигч М.Наранбаатар нь 1974 онд Өвөрхангай аймгийн Арвайхээр суманд төрсөн. 1991 онд дунд сургууль дүүргэж, 2002-2004 онд Удирдлагын академи, 2016-2019 онд Шихихутаг их сургуулийг төгссөн. Эрх зүйч мэргэжилтэй. 1996 онд МУИС-ийн ОУХПС-ийн Гадаад албаны ажилтан, 1996-2006 онд Монголын Үндэсний олон нийтийн телевизд редактор, ахлах редактор, 2006-2015 онд Монголын Үндэсний олон нийтийн телевизийн захирал, 2015-2018 онд МСНЭ-ийн дэд ерөнхийлөгч, 2019 оноос Энх тайван найрамдлын байгууллагын дэд ерөнхийлөгчөөр ажиллаж байгаа юм байна.

    Нэр дэвшигч Ч.Батцэнгэл нь 1976 онд Улаанбаатар хотод төрсөн. 1993 онд дунд сургуулиа дүүргэж, 1997 онд МУБИС-ийг сэтгүүлч мэргэжлээр, 2016 онд Их засаг сургуулийг эрх зүйч мэргэжлээр тус тус төгссөн. Сэтгүүл зүйн магистрын зэрэгтэй. 1997-2014 онд Монголын Үндэсний олон нийтийн телевизийн редактор, хэлтсийн дарга, дэд захирал, 2015 онд “Монголын Үнэн” сонины орлогч эрхлэгчээр ажиллаж байсан. 2016 оноос Монголын Үндэсний олон нийтийн радио, телевизийн “ММ” сувгийн захирлаар ажиллаж байгаа юм байна.

    Нэр дэвшигч Б.Ганболд нь 1955 онд Увс аймгийн Улаан гом суманд төрсөн. 1973 онд дунд сургуулиа дүүргэж, 1979 онд Москвагийн их сургуулийг сэтгүүлч мэргэжлээр төгсчээ. 1989 онд Москва нийгмийн ухааны академид түүхийн ухааны докторын зэрэг хамгаалсан байна. Тэрбээр 1979-1992 онд “Үнэн” сонинд сэтгүүлч, 1992-1996 онд Улсын Их Хурлын гишүүн, 1996-1999 онд “Ардын эрх” сонинд орлогч эрхлэгч, 1999-2000 онд “Зууны мэдээ” сонины Ерөнхий эрхлэгч, 2000-2006 онд Радио, телевизийн ХЭГ-ын дарга, 2007-2013 онд “Үндэсний шуудан” сонины эрхлэгч, 2014-2020 онд “Монголын Үнэн” сонины Ерөнхий эрхлэгчээр ажиллаж байжээ.

    Тооллогын комиссын дүнг танилцуулсны дараа Байнгын хорооны дарга Л.Энх-Амгалан “Монголын Үндэсний олон нийтийн радио, телевизийн Yндэсний зөвлөлийн гишүүнээр томилох тухай” Улсын Их Хурлын тогтоолын төслийг танилцуулав. Монгол Улсын Их Хурлын чуулганы хуралдааны дэгийн хуулийн 108 дугаар зүйлийн 108.2, Олон нийтийн радио, телевизийн тухай хуулийн 21 дүгээр зүйлийн 21.8 дахь хэсгийг үндэслэн Монголын Үндэсний олон нийтийн радио, телевизийн Үндэсний зөвлөлийн гишүүнээр Ж.Цэсэн, М.Уянга, Г.Отгонбаяр, Д.Цоодол, М.Наранбаатар, Ч.Батцэнгэл, Б.Ганболд нарыг тус тус томилохоор төсөлд тусгажээ. Тогтоолын төслийг дэмжих томьёоллоор санал хураалт явуулахад хуралдаанд оролцсон 15 гишүүний 14 нь дэмжсэн. Уг төсөл дэмжигдсэнтэй холбоотойгоор “Монголын Үндэсний олон нийтийн радио, телевизийн Yндэсний зөвлөлийн гишүүнээс чөлөөлөх тухай” Улсын Их Хурлын тогтоолын төслийг хэлэлцэв. Төслийн талаар Л.Энх-Амгалан гишүүн танилцуулсан. Монгол Улсын Их Хурлын чуулганы хуралдааны дэгийн хуулийн 108 дугаар зүйлийн 108.2, Олон нийтийн радио, телевизийн тухай хуулийн 21 дүгээр зүйлийн 21.2 дахь хэсгийг үндэслэн Д.Нямсамбуу, Б.Энхмандах, Б.Батбаяр, Д.Оюун-Эрдэнэ, Д.Цэндсүрэн, З.Энхболд, Б.Золбаяр нарын бүрэн эрхийн хугацаа дуусгавар болж байгаа тул Монголын Үндэсний олон нийтийн радио, телевизийн Үндэсний зөвлөлийн гишүүнээс чөлөөлөхөөр, тогтоол 2021 оны 01 дүгээр сарын 01-ний өдрөөс хэрэгжихээр төсөлд тусгасан байна. Улсын Их Хуррлын дээрх тогтоолын төслийг дэмжих томьёоллоор санал хураалт явуулахад гишүүд 93.3 хувийн саналаар дэмжсэн. Иймд энэ талаарх Байнгын хорооны санал, дүгнэлтийг чуулганы нэгдсэн хуралдаанд танилцуулахаар боллоо хэмээн Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.