Ажлын хэсгийн хуралдааныг Улсын Их Хурлын гишүүн, Ажлын хэсгийн ахлагч С.Одонтуяа удирдаж, хуралдаанд Улсын Их Хурлын гишүүн, Ажлын хэсгийн гишүүн Ж.Батсуурь, Л.Энх-Амгалан, Л.Эрдэнэчимэг болон Улсын Их Хурлын гишүүн, хуулийн төсөл санаачлагч С.Ганбаатар, ажлын дэд хэсгийн гишүүд бүрэн бүрэлдэхүүнээр оролцлоо.

Улсын Их Хурлын гишүүн, Ажлын хэсгийн ахлагч С.Одонтуяа Ажлын хэсгээс гаргасан зарчмын зөрүүтэй саналын томьёоллуудыг уншиж танилцуулан, санал хураалт явууллаа. Санал хураалтад оролцсон Улсын Их Хурлын гишүүдээс саналын томьёололтой холбогдуулан Ажлын дэд хэсгийн гишүүдээс асуулт асууж хариулт авлаа. Хуулийн төслийн эрүүл мэндийн даатгалын байгууллагын тогтолцоо, бүтэц, байгууллагын удирдлагын талаарх саналын томьёоллыг дахин ярилцах шаардлагатай гэж үзэн саналуудыг нээлттэй үлдээлээ.

Ажлын хэсгийн гишүүд даатгуулагчдад үзүүлэх эрүүл мэндийн тусламж үйлчилгээний үндсэн багцыг өргөжүүлэх, даатгалын гэрээний агуулга, гэрээ байгуулах нөхцөл шаардлагуудыг өндөрсгөх, хүн амын шимтгэл төлөлт, шимтгэлийн хувь хэмжээг тогтоох зэрэг асуудлуудтай холбогдон гаргасан саналын томьёоллуудаар санал хураалт явууллаа.

Ажлын хэсгийн хуралдаан 17.30 цагт өндөрлөлөө.