УИХ-ын гишүүн Н.Оюундарь тэргүүтэй төлөөлөгчид Улсын Их Хурал, Европын парламент хоорондын 11 дүгээр зөвлөлдөх уулзалтад оролцов

  2017-12-14 13:09  232

УИХ-ын гишүүн, УИХ дахь Европын парламенттай харилцах бүлгийн дарга Н.Оюундарь, УИХ-ын гишүүн Л.Мөнхбаатар, Г.Мөнхцэцэг нар Брюссель хотноо 12 дугаар сарын 7-ны өдөр болсон Монгол Улсын Их Хурал, Европын парламент хоорондын 11 дүгээр зөвлөлдөх уулзалтад оролцов.


Төлөөлөгчдийг Европын Парламентын Төв Ази, Монгол Улстай харилцах бүлгийн дарга Ивета Григуле хүлээн авч уулзав. Уг уулзалтын үеэр хоёр талын улс төр, эдийн засгийн нөхцөл байдал, парламент хоорондын 10 дугаар уулзалтаас хойш гарсан өөрчлөлт болон цаашдын хамтын ажиллагааны талаар харилцан ярилцаж, аюулгүй байдал, бүс нутгийн асуудлуудаар санал солилцов. 

Монгол Улсад болсон УИХ-ын болон Ерөнхийлөгчийн сонгуулийн дүн манай улсын ардчилсан тогтолцоо нь иргэний нийгэмтэйгээ нягтран бэхжсэнийг харуулсан болохыг Европын Парламентын зүгээс тэмдэглэв. Мөн энэ жил хоёр талын харилцаанд томоохон үйл явдлууд тохиож Монгол Улс, Европын Холбооны хооронд байгуулсан Түншлэл, хамтын ажиллагааны хэлэлцээр (ТХАХ) 11 дүгээр сарын 1-ний өдөр хүчин төгөлдөр болсныг хоёр тал сайшаан тэмдэглэж, энэхүү хэлэлцээр одоогийн харилцааг цаашид бэхжүүлж, сайн засаглал, хүний эрх, тогтвортой хөгжлийн нийтлэг зорилтуудыг хэрэгжүүлэхэд чухал ач холбогдолтой болохыг тэмдэглэв. Түүнчлэн Улаанбаатар хотод Европын Холбооны Төлөөлөгчийн газар нээгдсэн нь дээрх хэлэлцээрийг хэрэгжүүлж эхэлснээр хоёр талын харилцаа улам идэвхжиж байгаагийн илрэл болсныг хоёр тал тэмдэглэв. Мөн Европын холбооноос гаргасан татварын ил тод бус тогтолцоотой улс орнуудын “хар жагсаалт”-ад багтаасан нь харамсалтай алхам болсныг УИХ-ын гишүүн Н.Оюундарь тэмдэглээд жил бүр гаргах энэхүү жагсаалтаас Монгол Улсын нэрийг хасуулах чиглэлээр хамтран ажиллахыг санал болгов. Мөн Европын Холбооны зүгээс манай эдийн засгийн бүтцийн шинэчлэлийн үйл явцад санхүүгийн дэмжлэг үргэлжлүүлэн үзүүлэхээ амласан болно.


Монгол Улсын Их Хурал дахь Европын Парламенттай харилцах бүлэг болон Европын Парламентын Монгол Улс, Төв Азитай харилцах бүлэг хооронд хамтын ажиллагааны нэгэнт тогтсон хэлбэрүүдийг бэхжүүлж, цаашид хоёр ард түмний тусын тулд харилцан ашигтай харилцааг гүнзгийрүүлэн төрөлжүүлэхэд хувь нэмрээ оруулна гэдэгт итгэл төгс байгаагаа талууд илэрхийлж уулзалтын дүнгээр хамтарсан мэдэгдэл гаргасан болно. Европын Холбооноос хэрэгжүүлэх хөгжлийн албан ёсны тусламжийг 2020 он хүртэл 65 сая еврод хүргэхээ мэдэгдээд байгаа.


Мөн Монгол Улс, Европын Холбооны хооронд байгуулсан ТХАХ хүчин төгөлдөр болсонтой холбогдуулан талууд Монгол Улсын Их Хурал, Европын Парламентын хооронд Парламентын хамтын ажиллагааны Хороо байгуулахаар тохиролцов. Уулзалтын үеэр УИХ-ын төлөөлөгчид Европын Парламентын байранд залах Алтан гэрэгэ гардуулсан байна. Алтан гэрэгэ Нью-Йорк дахь НҮБ-ын төв байр болон Вена дахь төвийн гол танхимд залагдсан байдаг гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.


  2017-12-14 13:09  232