Ерөнхий сайд нарын хөрөг зураг | Мэдээллийн дэлгэрэнгүй | Parliament

ParliamentMN

Tweets by ParliamentMN

Ерөнхий сайд нарын хөрөг зураг

2018-02-03 14:14 1760

Tweet

Монгол Улсын Ерөнхий Сайд нь Монгол Улсын гүйцэтгэх засаглалын тэргүүн бөгөөд Засгийн газрыг тэргүүлдэг. Монгол Улсын Ерөнхий сайдыг Монгол Улсын Их Хурал томилно.

Сайн Ноён хан Төгс-Очирын Намнансүрэн (1878 - 1919) нь Монгол Улсын анхны Ерөнхий сайд байв. Халхын Сайн ноён хан Төгс-Очирын Намнансүрэн нь одоогийн Өвөрхангай аймгийн Уянга сумын нутагт 1878 онд төржээ. 1884 онд тэрээр бэйс Чимэддорждоной, түшмэд Шийлэг нартай багш шавийн барилдлагаа бариулжээ.

Т.Намнансүрэн 1918-1919

Гончигжалцангийн Бадамдорж нь Богдхаант Монгол Улсын Ерөнхий сайд бөгөөд Монгол Улсын тусгаар тогтнолын үйлст гарамгай гавъяа байгуулсан боловч энэхүү гавьяагаа гамингийн генерал Сю-шүжаны сүрдүүлгээс болон харлуулсан нэгэн.

Г.Бадамдорж 1919.04.09

Догсомын Бодоо (1885 - 1922) нь Монгол Улсын дөрөв дэх Ерөнхий сайд, Консулын дэнжийн нууц бүлгийн үндэслэн байгуулагч, Ардын хувьсгалын анхны долоогийн нэг, Монголын төрийн нэрт зүтгэлтэн хүн байв. 1922 оны 8-р сарын 31-нд улс төрийн хилс хэрэгт хэлмэгдэн цаазаар авахуулсан.

Д.Бодоо 1921-1922

Содномын Дамдинбазар (1874 - 1923) нь Монгол Улсын тусгаарлах хөдөлгөөнд чухал үүрэг гүйцэтгэсэн, тав дахь Ерөнхий сайд нь байв. Түүнийг мөн Барон Унгерний засгийн газар доор Ерөнхий сайд байсан гэдэг боловч зарим эх сурвалжууд Дотоод явдлын сайд байсан хэмээн заадаг.

С.Дамдинбазар 1922-1923

Балингийн Цэрэндорж (1868 оны 5-р сарын 2 - 1928 оны 2-р сарын 13) нь Монгол Улсын зургаа дахь Ерөнхий сайд байв.
Хичээнгүй сайд хэмээх Балингийн Цэрэндорж 1868 онд төржээ. Багаасаа гэрийн боловсрол эзэмшсэн тэрбээр 1865 - 1911 онд Манж заргын яаманд бичээч, орчуулагч түшмэл, 1913-1915 онд гадаад яамны дэд сайд, 1915-1919 онд тэргүүн сайд, 1921 оны 3-р сараас Гадаад яамны эрхэлсэн түшмэл, 1922-1923 онд Гадаад яамны сайдаар ажиллаж байжээ. 1915 онд Хиагтын гэрээ байгуулах 3 улсын уулзалтанд Монголын төлөөлөгчдийг Хятадын шаардлагаар солиход тухайлан Цэрэндоржийг нэрлэн ирүүлсэн байна. Мөн 1919 онд Монголын Автономитыг устгах гэрээнд Шанзудба Бадамдоржийн хамт идэвхийлэн оролцож гарын үсэг зурж баталгаажуулсан гол хүний нэг юм.

Б.Цэрэндорж 1923-1928

Анандын Амар (1886 - 1941) нь Монгол төрийн тулхтай зүтгэлтэн байв. Тэрээр 1928 оны 2-р сарын 21-нээс 1930 оны 4-р сарын 27-ныг хүртэл Монгол Улсын Ерөнхий сайд, 1934 оны 6-р сарын 2-ноос 1936 оны 3-р сарын 22-ныг хүртэл Улсын Бага Хурлын Тэргүүлэгчдийн дарга, 1936 оны 3-р сарын 22-ноос 1939 оны 3-р сарын 7-ны хооронд дахин Ерөнхий сайдаар тус тус ажилласан. 1939 онд баривчлагдаж, 1941 онд Москва хотод цаазаар авахуулжээ.

А.Амар 1928-1930, 1936-1939

Цэнгэлтийн Жигжиджав (1894 - 1933) нь Монгол Улсын найм дахь Ерөнхий сайд юм. Тэрээр 1924 онд Сангийн яамны дэргэдэх нягтлан бодохын сургуулийг дүүргэж, 1928-1930 онд Монголын харилцан туслалцах хоршооны нягтлан бодогч, даргаар ажиллаж байв. 1930 оны 4-р сарын 27-нд Монгол Улсын Ерөнхий сайдаар томилогдсон. 1932-1933 онд Худалдаа зам тээвэр, харилцан нэвтрэлцэх яамны сайдаар ажиллаж байсан.

Ц.Жигжиджав 1930-1932

Пэлжидийн Гэндэн (1895 - 1937) нь Монголын улс төрийн зүтгэлтэн, Монгол Улсын ес дэх Ерөнхий сайд байв. П.Гэндэн нь 1895 онд хуучнаар Сайн ноён хан аймгийн Үйзэн вангийн хошуу буюу одоогийн Өвөрхангай аймгийн Тарагт суманд төржээ.
1928 оноос МАХН-ын Төв хорооны Ерөнхий нарийн бичгийн даргаар ажиллаж байгаад 1932 оноос Монгол Улсын Ерөнхий сайдаар томилогдсон.
1936 онд бүх албан тушаалаасаа огцорч Зөвлөлт Холбоот Улсад амрахаар яваад 1937 оны 7-р сарын 10-нд эх орноосоо урвасан хэмээх хилс хэрэгт ял тулгагдан баривчлагдаж, 1937 оны 11-р сарын 26-ны өдөр ЗХУ-д цаазлагджээ.

П.Гэндэн 1932-1936

Монгол Улсын 12 дахь Ерөнхий сайд Хорлоогийн Чойбалсан (Жамц эцгийн хүү боловч Хорлоо гэж эхийнхээ нэрээр овоглогджээ, төрөхдөө Дугар гэсэн нэртэй байсан) нь 1930-аад оноос нас барах хүртлээ Бүгд Найрамдах Монгол Ард Улсыг удирдаж байлаа. Монгол дахь Төвөдийн буддын шашны Чойбалсан хийдэд бага насандаа шавилан сууж байснаас Чойбалсан нэрээр олонд танигдаж улмаар нэрээ сольжээ. Чойбалсан гэдэг нь сайн цогт ном эрдэм гэсэн утгатай төвөд үг юм. Манж Чин гүрний Сэцэн хан аймгийн Ачит вангийн хошуунд мэндэлж, Зөвлөлт Социалист Бүгд Найрамдах Холбоот Улсын Москва хотод нас барсан.

Х.Чойбалсан 1939-1952

Юмжаагийн Цэдэнбал (1916.09.17 - 1991.04.21) нь 1940 оноос 1984 он хүртэл БНМАУ-ын удирдаж байв. Тэрээр амьдралынхаа туршид БНМАУ-ын Төрийн тэргүүн, Ерөнхий сайд, МАХН-ын Төв Хорооны Ерөнхий нарийн бичгийн дарга, Улс төрийн товчооны гишүүнээр ажиллаж байв. БНМАУ-ын баатар, хөдөлмөрийн баатар.

Ю.Цэдэнбал 1952-1974

Жамбын Батмөнх (1926.03.10 - 1997.05.14) нь Монголын сүүлчийн коммунист удирдагч юм. Тэрбээр Монголын төрийн зүтгэлтэн бөгөөд БНМАУ-ын Ерөнхий сайд, Төрийн тэргүүний алба хашиж байсан эрдэмтэн, профессор хүн юм.
Тэрээр Увс аймгийн Хяргас суманд төрсөн. 1939-1951 онд Хяргас сумын бага сургууль, Улаангом хотын дунд сургууль, МУИС-ийг тус тус төгсөж эдийн засагч мэргэжил эзэмшжээ.

Ж.Батмөнх 1974-1984

Думаагийн Содном (1933.07.14-нд төрсөн) нь Монгол Улсын 14 дэх Ерөнхий сайд юм.
Тэрээр Дорноговь аймгийн Өргөн сумын нутагт төрсөн. 1954-1958 онд Эрхүү хотын санхүү, эдийн засгийн дээд сургуулийг төгссөн.

Д.Содном 1984-1990

Шаравын Гунгаадорж нь Монгол Улсын 15 дахь Ерөнхий сайд, улс төрч юм. Хөдөө аж ахуйн ухааны доктор, хөдөө аж ахуйн шинжлэх ухааны академийн гишүүн.

Ш.Гунгаадорж 1990.03-1990.09

Дашийн Бямбасүрэн нь 1942 оны 6-р сарын 20-нд Хэнтий аймгийн Биндэр суманд төржээ. Эдийн засгийн ухааны доктор бөгөөд Статистикийн хороо, Улсын үнийн хороо, Үнэ стандартын улсын хороо, Авто тээврийн барилга угсралтын засварын трест, ШУТ-н Улсын хорооны харьяа Эрдэм шинжилгээний төвд тус тус ажиллаж байв.

Д.Бямбасүрэн 1990-1992

Пунцагийн Жасрай (1933.11.26 - 2007.10.25) нь Монголын улс төрч, эдийн засагч. 1992 оноос 1996 он хүртэл Монгол Улсын 17 дахь Ерөнхий сайд. Тэрээр 1933 оны 11 сарын 26-нд Говь-Алтай аймгийн Бугат суманд төрсөн.

П.Жасрай 1992-1996

Мэндсайханы Энхсайхан нь улстөрч, Монгол Улсын 18 дахь ерөнхий сайд юм. Тэрээр 1990-1992 онд АИХ-ын депутат, Улсын Бага Хурлын гишүүн, Байнгын хорооны дарга, 1992-1993 онд УИХ-ын гишүүн, 1993 онд Монгол Улсын Ерөнхийлөгчийн Тамгын газрын дарга, 1996-1998 онд Монгол Улсын Ерөнхий сайд, 2003-2005 онд Ардчилсан намын дарга, 2004 онд УИХ-ын гишүүнээр сонгогдон ажиллаж байв. 2004-2006 онд Аюулгүй байдал, гадаад бодлогын байнгын хорооны дарга. 2006 оны 1-р сараас 2008 он хүртэл Монгол Улсын Засгийн газрын гишүүн, Монгол Улсын Шадар сайдаар тус тус ажилласан.

М.Энхсайхан 1996-1998

Цахиагийн Элбэгдорж нь Монгол Улсын Ерөнхий Сайдаар хоёр удаа, Монгол Улсын Ерөнхийлөгчөөр хоёр удаа /2009.06.18 - 2017.07.10/, Монгол Улсын Их Хурлын дэд даргаар нэг удаа, УИХ-ын гишүүнээр дөрвөн удаа тус тус сонгогдон ажилласан.

Ц.Элбэгдорж 1998, 2004-2006

Жанлавын Наранцацралт (1957 - 2007) нь Монгол Улсын 20 дахь Ерөнхий сайдаар ажиллажээ. Тэрээр 1996-1998 онд Нийслэлийн Засаг дарга бөгөөд Улаанбаатар хотын захирагч, 1998-1999 онд Монгол Улсын Ерөнхий сайд, 1999-2000 онд МУИС-д багш, зөвлөх профессор, 2000, 2004 онд УИХ-ын гишүүнээр сонгогдон ажиллаж байв. 2004-2006 онд Байнгын хорооны даргаар сонгогдон ажиллаж, 2006 оны 1-р сараас Барилга хот байгуулалтын сайдаар томилогдон ажиллаж байлаа.

Ж.Наранцацралт 1998-1999

Ринчиннямын Амаржаргал (1961 оны 2-р сарын 27-нд төрсөн, 1999 оны 7-р сарын 30-наас 2000 оны 7-р сарын 26-ны хооронд ажилласан) нь Монгол Улсын 21 дэх Ерөнхий сайд байв. Монгол Улсын Их Хуралд ардчилсан хүчин олонхи болж чадсан 1996 оны сонгуулиар МҮАН, МСДН -ын Ардчилсан Холбоо эвсэлээс нэр дэвшин Р.Амаржаргал УИХ-ын гишүүн болсон юм. 2004 онд сонгуулийн 64-р тойрогт бие даан нэр дэвшиж 2 дахь удаагаа, 2008 онд Арчилсан намаас Ховд аймагт нэр дэвшин 3 дахь удаагаа, 2012 онд Сүхбаатар дүүрэгт нэр дэвшиж тус дүүргийн иргэдийн итгэлийг хүлээж УИХ-ын гишүүнээр 4 дэх удаагаа сонгогдон ажилласан. 2016 оны УИХ-ын сонгуульд эмэгтэй нэр дэвшигчдэд боломж олгох үүднээс өөрийн нэрийг сайн дураар татсан.

Р.Амаржаргал 1999-2000

Намбарын Энхбаяр нь Монгол Улсын Ерөнхий Сайд, УИХ-ын дарга, Монгол Улсын Ерөнхийлөгчийн албыг хашиж ирсэн улс төрч юм. 1992, 1997, 2000, 2004 онуудад УИХ-ын гишүүнээр 4 удаа сонгогджээ. 2004-2005 онд Улсын Их Хурлын даргаар сонгогдон ажилласан. Тэрбээр 2005 онд Монгол Улсын гурав дахь Ерөнхийлөгчөөр сонгогдсон юм.

Н.Энхбаяр 2000-2004

Миеэгомбын Энхболд (1964 оны 7-р сарын 19-нд төрсөн ) нь 2006-2007 онуудад Монгол Улсын Ерөнхий сайдаар ажилласан тэрээр 1999-2005 онд Нийслэлийн Засаг дарга бөгөөд Улаанбаатар хотын захирагч, 2005 онд Монгол Улсын Их Хурлын гишүүн, 2006-2007 онд Монгол Улсын Ерөнхий сайд, 2007-2012 онд Монгол Улсын Шадар сайд, 2012-2016 онд Монгол Улсын Их Хурлын дэд дарга, 2016 оноос Монгол Улсын Их Хурлын даргаар сонгогдон ажиллаж байна.

М.Энхболд 2006-2007

Санжийн Баяр (1956 оны 3-р сарын 4-нд төрсөн) нь улс төрч, дипломатч, Монгол Улсын 25 дахь Ерөнхий сайд. Тэрээр 1990-1992 онд БНМАУ-ын Бага Хурлын гишүүн, Төрийн байгуулалтын байнгын хорооны дарга, 1997-2001 онд Монгол Улсын Ерөнхийлөгчийн Тамгын Газрын дарга, 2001-2005 онд Монгол Улсаас ОХУ-д суух Онц бөгөөд Бүрэн эрхт Элчин сайдаар ажиллаж байсан.

С.Баяр 2007-2009

Сүхбаатарын Батболд (1963 оны 6-р сарын 24-нд төрсөн) нь Монгол Улсын 26 дахь Ерөнхий сайд юм. 2000 - 2004 онд Гадаад хэргийн яамны дэд сайд. 2004 онд УИХ-ын гишүүнээр сонгогдож, 2004 - 2006 онд Ц.Элбэгдоржийн тэргүүлсэн, Эвслийн засгийн газарт Засгийн газрын гишүүн, Үйлдвэр, худалдааны сайдаар ажиллаж байсан.

С.Батболд 2009-2012

Норовын Алтанхуяг нь Монгол Улсын 27 дахь Ерөнхий сайд юм. 1958 оны 1-р сарын 20-нд Увс аймгийн Улаангом хотод төрсөн. 1996 онд УИХ-ын гишүүнээр сонгогдон, 1998 онд Хөдөө аж ахуй, үйлдвэрийн сайдаар, 2004 онд Эвслийн Засгийн газрын Сангийн сайдаар томилогдон ажилласан бол 2008 оноос УИХ-ын гишүүнээр сонгогдож, 2008-2012 онд МУ-ын Тэргүүн шадар сайдаар ажиллажээ.

Н.Алтанхуяг 2012-2014

Чимэдийн Сайханбилэг нь улс төрч, Монгол Улсын 28 дахь Ерөнхий сайд юм. Тэрээр 1991 онд Монголын Залуучуудын Холбоонд, 1992-1997 онд Монголын Залуучуудын Холбооны Нарийн бичгийн даргаар, 1996-2000 онд Монгол Улсын Их Хурлын гишүүн, 1997-2002 онд Монголын Залуучуудын Холбооны Ерөнхийлөгч, 1998-1999 онд Монгол Улсын Засгийн газрын гишүүн, Гэгээрлийн сайд, 2008 оны УИХ-ын ээлжит сонгуулиар Монгол Улсын Их Хурлын гишүүн болж, 2012 оны УИХ-ын зургаа дахь удаагийн сонгуулиар Монгол Улсын Их Хуралд дахин сонгогдож, Шинэчлэлийн Засгийн газрын гишүүн, Монгол Улсын сайд, Засгийн газрын Хэрэг эрхлэх газрын даргаар тус тус томилогдон ажилласан.

Ч.Сайханбилэг 2014-2016

2018-02-03 14:14 1760

Tweet

Улсын Их Хурлын Тамгын газар. Монгол Улс 14201 Улаанбаатар хот, Сүхбаатар дүүрэг, Жанжин Д.Сүхбаатарын талбай 1, Төрийн ордон.

Утас: +976-51-267016
Факс: +976-11-327016

Цахим шуудан: secretariat@parliament.mn

Монгол Улсын Их Хурлын Тамгын газар © 2019.