УИХ-ын даргын ивээл дор зохиогддог Шатар сонирхогчдын улсын аварга шалгаруулах тэмцээн Төрийн ордонд эхэллээ


  2020-01-11 18:21  659


Монгол Улсын Үндсэн хууль батлагдсаны 28 жилийн ойд зориулан Улсын Их Хурлаас уламжлал болгон зохион байгуулдаг шатар сонирхогчдын улсын аварга шалгаруулах тэмцээний шувтаргын тоглолт өнөөдөр /2020.01.11/ Төрийн ордонд эхэллээ.

Улсын Их Хурлын дарга, Монголын шатрын холбооны хүндэт ерөнхийлөгч Г.Занданшатар тэмцээнийг нээж үг хэлэв. Тэрбээр шатар сонирхогчдын улсын аварга шалгаруулах тэмцээнд шалгаран оролцож байгаа шатарчдад Үндсэн хууль батлагдсаны 28 жилийн ойн баярын мэндийг уламжлаад “Хүний хувь заяа их сонин. Найман жилийн өмнө миний бие Монголын шатрын холбооны ерөнхийлөгчөөр ажиллаж байхдаа тухайн үеийн Улсын Их Хурлын даргын ивээл дор шатар сонирхогчдын улсын аварга шалгаруулах тэмцээнийг санаачлан зохион байгуулж байхдаа энэ тэмцээнийг нээж үг хэлнэ гэж төсөөлж байсангүй.”гэж байлаа.



Мөн тэрбээр хэлсэн үгэндээ, Жилээс жилд энэ тэмцээний нэр хүнд өсч, оролцогчдын хүрээ тэлж байгаад баяртай байдаг. Энэ тэмцээний эхний шат  өнгөрсөн 11 дүгээр сард  330 сум, нийслэлийн 9 дүүрэгт эхэлж, 4885 шатарчид оролцсон байна. Эндээс 800 гаруй  шатарчин шалгарч 21 аймаг, нийслэлийн аварга шалгаруулах тэмцээнд өрсөлдсөн. Энэхүү тэмцээнд найман настай балчраас наян настай буурал өрсөлдсөн бөгөөд үүнийг шатрын гайхамшиг гэнэ. Нэг өрөг дээр насны зөрүүтэй хүмүүс ийн өрсөлддөг спорт байхгүй. Эхний шатны тэмцээнд Увс аймагт 676, Баянхонгор аймагт 415, Хөвсгөл аймагт 356 буюу хамгийн их шатарчин оролцсоноороо бусад аймгуудаа манлайлсан байна. Монгол шиг ингэж бүх насныхан шатар тоглодог, сонирхдог орон байхгүй биз. Шатар бол их гүрнүүд, их үндэстний тоглоом гэж боддог. Дэлхийд АНУ, ОХУ, БНХАУ, Энэтхэг, европын томоохон гүрнүүд  шатрын спортоор ноёлдог. Тэгвэл 3-хан сая хүнтэй монголчууд, ялангуяа өсвөрийн шатарчид дэлхийд тэргүүлж, ноёлж байгаа нь монгол хүний оюуны цар хүрээг харуулж байгаа сайхан жишээ гэж боддог” гэж байлаа.


Түүнчлэн тэрбээр, Улсын Их Хурлаас оюуны спортыг улс орон даяар хөгжүүлж, бодитой дэмжлэг үзүүлэх зорилгоор энэхүү тэмцээнийг зохион байгуулж ирснийг дурдаад энэхүү санаачлагыг дэмжиж, Баянхонгор аймгийн Иргэдийн Төлөөлөгчдийн Хурлаас аймгаараа шатарчин болох хөдөлгөөн өрнүүлж байгааг дуулгалаа. 

Энэ үеэр Монгол Улсын Ерөнхийлөгчийн Эдийн засаг, аж үйлдвэрийн бодлогын асуудал хариуцсан зөвлөх Ц.Эрдэнэбат, Улсын Их Хурлын даргад дурсгалын шатар гардуулсны дараа Г.Занданшатар дарга Монгол Улсын гавьяат тамирчин Ц.Батчулуунтай хүндэтгэлийн өрөг  нүүлээ.




Монгол Улсын Үндсэн хууль баталсан өдөрт зориулсан энэхүү тэмцээнд  оролцогчдоос хамгийн ахмад нь Ардын Их Хурлын депутат 81 настай Д.Найдан, эмэгтэйчүүдээс 79 настай Д.Дончин нар байсан бол хамгийн залуу нь 19 настай  Б.Батсуурь, Б.Халиун нар байлаа. Тэмцээнд эрэгтэй 102, эмэгтэй 36, нийт 138 шатарчин оюун ухаанаараа өрсөлдөх бөгөөд медальт байранд шалгарагсдад шатрын спортын дэд мастер цолыг гардуулах аж. 



Тэмцээний нээлтийн үйл ажиллагаанд, Улсын Их Хурлын гишүүн Б.Пүрэвдорж, Х.Болорчулуун, Ардын Их Хурлын депутат Д.Найдан, Л.Пүрэвгял, С.Билэгсайхан, В.Цамба, УИХ-ын Тамгын газрын ерөнхий нарийн бичгийн дарга Л.Өлзийсайхан, Хууль эрх зүйн асуудал хариуцсан нарийн бичгийн дарга Н.Цогтсайхан, Монгол Улсын гавьяат дасгалжуулагч П.Жигжидсүрэн, Ж.Лхагва, Монгол улсын гавьяа тамирчин Ц.Батчулуун болон их мастер Б.Мөнгөнтуул, А.Энхтуул нарын албаны хүмүүс оролцлоо гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв. 



  2020-01-11 15:32  659