Байнгын хорооны дарга Д.Тэрбишдагва Япон Улсын Дотоод хэрэг, харилцаа холбооны дэд сайд Кэнжи Харадатай уулзлаа

  2017-05-02 12:27  180

УИХ-ын Эдийн засгийн байнгын хорооны дарга Д.ДТэрбишдагва өнөөдөр (2017.05.02) Монгол Улсад айлчилж буй Япон Улсын Дотоод хэрэг, харилцаа холбооны дэд сайд ноён Кэнжи Харадатай уулзав.

Уулзалтын эхэнд Байнгын хорооны дарга Д.Тэрбишдагва ноён Кэнжи Харадаг Монгол Улсад тавтай морилохыг хүсээд Монгол, Японы харилцаа иж бүрэн түншлэлийн харилцаанд шилжсэнийг онцоллоо.

Япон Улсын Дотоод хэрэг, харилцаа холбооны дэд сайд Кэнжи Харада, Байнгын хорооны даргатай уулзаж байгаадаа туйлын баяртай байна гээд хоёр улсын хооронд дипломат харилцаа тогтоосны 45 жилийн ой энэ жил тохиож байгааг онцлов.

Тэрбээр, Япон, Монгол улс нь стратегийн түншлэлийн харилцаанд шилжсэн. Энэ хүрээнд хамтын ажиллагаа өргөжиж байна. Саяхан Монгол Улсын Их Хурлын дарга М.Энхболд манай улсад айлчлал хийх үеэрээ энэ харилцааг бататгаж, нотолсон билээ. Мөн энэ оны 2 дугаар сард Монголын Үндэсний статистикийн хорооны дарга А.Ариунзаяа тэргүүтэй төлөөлөгчид манай Статистикийн товчооны урилгаар айлчилж, хамтран ажиллах Санамж бичигт гарын үсэг зурсан. Японы Статистикийн товчоо 140 гаруй жилийн түүхтэй, улсынхаа хөгжил дэвшилд үнэтэй хувь нэмэр оруулсан байгууллага юм. Тийм ч учраас бидний туршлага, шинэлэг үйл ажиллагаа Та бүхэнд хэрэг болно гэдэгт итгэлтэй байна гэлээ.

Дараа нь талууд бусад асуудлаар ярилцаж, санал солилцсон юм.

Уулзалтад Үндэсний статистикийн хорооны дарга А.Ариунзаяа, Япон Улсаас Монгол Улсад суугаа Онц бөгөөд Бүрэн эрхт Элчин сайд Масато Такаока тэргүүтэй Элчин сайдын яамны төлөөлөгчид байлцлаа гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.


  2017-05-02 12:27  180